Xhevdet Pozhari, në emisionin “Këndi i debatit” në Tëvë1, ka komentuar vendimin e sotëm të Gjykatës Kushtetuese që ka dhënë afat 12 ditë për konstituimin e Kuvendit të Kosovës.
Ai theksoi se Vetëvendosje nuk është shkaktari i bllokadës në Kuvend, përkundrazi, sipas tij, ky subjekt ka treguar gatishmëri për të shkuar drejt zgjedhjeve kur është kërkuar.
“Vetëvendosja për çdo veprim që ka ndërmarrë ka marrë dënim dhe i ka vuajtur dënimet. Kur u kërkua nga Gjykata që të ndryshohet kandidati, ata e ndryshuan kandidatin dhe kanë shprehur vullnetin përmes veprimeve të tyre. Në asnjë moment nuk kanë qenë pro bllokadës. Bllokadën e kanë bërë ata që e dinin se nuk kanë numrat, por nuk u ka konvenuar që Kurti të jetë kryeministër,” deklaroi Pozhari.
Ai shtoi se Vetëvendosja ka treguar vullnetin për bashkëpunim dhe ka kërkuar që t’u jepet afati kushtetues për 15 ditë për të formuar qeverinë.
“Vetëvendosja ka treguar vullnetin, edhe kanë thënë ‘votoni dhe jepni afatin kushtetues prej 15 ditësh që të formohet qeveria,’” përfundoi Pozhari.
