Analisti, Xhevdet Pozhari ka kritikuar disa zyrtarë të Lidhjes Demokratike të Kosovës për deklarata që kanë dhënë për veprimet e Qeverisë së Kosovës në veri të vendit.
Pozhari ka thënë se artikulime të tilla se veprimet i ngjasojnë kohës së Millosheviqit dhe mbledhja e armëve asaj të Rankoviqit, nuk do të mund t’i artikulonte as ndonjë avokat i angazhuar nga Vuçiqi.
“Këto deklarata kushdo që i dëgjon në Serbi nuk do të mund t’i artikulonte në këtë formë qysh është duke i artikulua LDK-ja në raport me situatën në veri, as një avokat me punësua Vuçiqi për me krijuar ketë narracion s’do të kishte arrit në këtë formë. Me dal publikisht me thanë që shtrirja e ligjshmërisë në veri ka ngjashmëri me periudhën se si vepronte Millosheviqi, mbledhja e armatimit si në kohën e Rankoviqit, mu tërheq këto paralele, këtë as një avokat i Vuçiqit nuk kish ditë kështu me ndërthurë”, ka thënë ai në emisionin “Këndi i Debatit” në Tëvë1.
Nënkryetari i LDK-së, Gazmend Muhaxheri kohë më parë duke folur për veprimet në veri dhe deklaratën nga zyrtarët qeveritar se po vendoset ligji e kishte krahasuar me një të Sllobodan Millosheviq, i cili thoshte në vitin 1989 “Po vendosim shtetin ligjor në Kosovë”.
