Analisti politik, Xhevdet Pozhari ka deklaruar se ish-kandidati i Partisë Demokratike të Kosovës për kryetar të komunës së Prishtinës, Uran Ismaili është politikan me korrespodencë.
Sipas Pozharit, Ismaili shfaqet vetëm në kohë fushatash dhe zgjedhjesh dhe pas përfundimit të tyre ai është biznesmen me kohë të plotë.
“Uran Ismaili për mua është politikan me korrespodencë, do të thotë ai shfaqet vetëm në kohë fushatash dhe në momentin që nuk ka fushata dhe nuk ka zgjedhje, Uran Ismaili është full time biznesmen, pra ai është part time politikan dhe full time biznesmen. Nuk është prej atyre njerëzve të cilët kontribojnë në politikë nëse nuk ka ndonjë post, se nuk do të thotë që duhet ta kesh një pozitë politike dhe të jesh aktiv në politikë por kjo nuk do të thotë që ai nuk duhet të kandidohet”, ka thënë Pozhari në emisionin “Këndi i Debatit” në Tëvë1.
Megjithatë, ai konsideron se PDK-ja aktualisht nuk ka kandidat më të mirë për kryetar të Prishtinës sesa Ismaili, pasi siç ka theksuar, kjo dëshmohet nga rezultati i tij në zgjedhjet lokale të vitit 2021.
“Për momentin Partia Demokratike e Kosovës nuk ka figurë më të mirë sesa Uran Ismaili për kandidat për komunën e Prishtinës për shkak se e ka dëshmuar edhe rezultati zgjedhor se në zgjedhjet e fundit i ka marrë 44 mijë vota, pra është një politikan që e ka ngritur votën e PDK-së dhe e ka rezultatin më të mirë pas Limajt me të cilin PDK-ja ka garuar kundër Isa Mustafës. PDK-ja ka pasur një rënie të madhe pas asaj kandidature, ndërsa Uran ismaili e ka rikthyer dhe e ka rigjallëruar votën dhe tash natyrshëm pritet që ai të jetë kandidat”, është shprehur ai./teve1.info/
