Konsulenti politik, Xhevdet Pozhari, thotë se raportet të cilat e paraqesin situatën e lirisë së medias në Kosovë më keq sesa në vendet fqinje si Serbia, Maqedonia e Veriut apo Shqipëria nuk janë kredibile.
Pozhari nuk bindet nga raporti i organizatës Reporterët pa Kufij që Kosova renditet e 99-a në botë nga 180 shtete në indeksin vjetor të 2025-s për lirinë e shtypit.
“Personalisht, mua nuk më bind asnjë raport dhe nuk më duket kredibil, ai që e paraqet situatën e Kosovës më të keqe sesa mediat në Serbi, në Maqedoninë e Veriut, të paktën ato para gjuhës shqipe apo edhe në Shqipëri. Pra, cilido raporto që e paraqet Kosovës më alarmante sesa këto shtete fqinje duke e ditur se ne të gjithë komunikojmë me këto shtete dhe i ndjekim ngjarjet. Mendoj personalisht se duhet me u shikua metodologjia, sepse nuk mendoj që është ajo gjendje”, tha ai në emisionin “Këndi i Debatit” në Tëvë1.
Sipas tij, për faktin që në Kosovë ka gazetarë që kanë kontribuar që nga koha e Millosheveqit dhe në kohën e pasluftës, tregon që gjendja e lirisë së medias nuk është në gjendje më të keqe sesa në vendet e rajonit.
“Kur them që Kosova nuk është në gjendje më të keqe sesa Serbia, Maqedonia apo Shqipëria e them për shkakun e profesionalizimit të shumë gazetarëve që kanë kontribuar në kohët më të vështira dhe nuk janë trembur as në kohën e Millosheviqit, as në kohën e pasluftës dhe e kanë bërë punën e tyre me përkushtim. Mirëpo, nuk mundem me pranu kur një pronar i medias është biznesmen çohet e del nëpër studio televizive i kamufluar si gazetar tu e pas mendimin vetëm te interesi i tij, e me pa si sulm ndaj medias së lirë”, deklaroi Pozhari.
Kosova nga sot renditet e 99-a në botë nga 180 shtete në indeksin vjetor të 2025-s për lirinë e shtypit të organizatës Reporterët pa Kufij. Në indeks, Kosova renditet më së keqi në raport me shtetet e Ballkanit Perëndimor. Shqipëria renditet e 80-a, Mali i Zi i 37-i, Maqedonia e Veriut 42-ta, Bosnje e Hercegovina e 86-ta dhe Serbia e 96-a./teve1.info/
