Konsulenti politik, Xhevdet Pozhari, ka komentuar vendimin e Shteteve të Bashkuara të Amerikës për ta pezulluar dialogun strategjik me Kosovën.
Pozhari këtë vendim të ShBA-së e sheh si një zhvillim që lidhet jo vetëm me faktorët e jashtëm, por edhe me sjelljen e institucioneve dhe trashëgiminë e udhëheqësve të mëparshëm.
Ai tha se për publikun u bë e qartë se ka ekzistuar një dakordim për marrëveshjen, pasi sipas tij, në momentin e prezantimit të saj nuk pati jehonë aq të madhe sa pati tani kur u pezullua.
“Për shumicën e opinionit sot u bë e qartë se ka qenë një dakordim për të pasur një marrëveshje të tillë, ngase kur është prezantuar si e tillë nuk është se ka pasur ndonjë bujë të madhe sa pati sot kur u pezullua. Nga ajo që kuptova dhe nga përgjigjet e ambasadorët komentet më tepër ndërlidheshin me komentet që janë bërë nga LVV për Gjykatën Kushtetuese. Një pjesë e problemeve me të cilat sot përballet Kosova nuk burojnë vetëm nga qëndrimet e faktorëve të jashtëm, por edhe sjellja e institucioneve tona”, tha ai në emisionin “Këndi i Debatit” në Tëvë1.
Pozhari theksoi se një pjesë e problemeve të sotme burojnë edhe nga modeli i ndërtuar ndër vite nga udhëheqësit e Kosovës, të cilët, sipas tij, më shumë janë kujdesur të mos irritojnë Beogradin sesa të mbrojnë interesat e qytetarëve.
“Për vite me radhë institucionet tona kanë krijuar një model – komuniko me faktorin ndërkombëtar që shpesh fokusohet në shmangie të irritimit të Beogradit, sesa të përfaqësimit dinjitoz të përfaqësimit të interesave të qytetarëve. Këtë e kam përbazë kur çdo veprim që ka ndërmarrë kjo qeveri sa i përket shtrirjes së ligjshmërisë në veri e ka pasur një rezistencë ngaqë nuk ka qenë një reagim të cilin janë mësuar ta shohin nga liderët tanë. Pra, edhe si rezultat i kësaj që: të funksionojmë që ta mos irritojmë Beogradin që është pro rus, që është një shtet që s’ka agjendë evropiane – kështu flasin edhe matjet publike që janë bërë – ne disi e pranuam pavetëdije që maturinë edhe suksesin e qeveritarëve tanë ta masim me atë se sa janë të dëgjueshëm ndaj faktorit ndërkombëtar e jo sa janë konstruktiv”, tha Pozhari.
Ai shtoi se ky mentalitet është i trashëguar nga udhëheqësit e së kaluarës, të cilët edhe sot, në opozitë, nuk kanë hequr dorë nga kjo mënyrë funksionimi.
“Po, dhe sot kjo e konfirmon qasja dhe deklaratat e atyre që dikur kanë qenë në pushtet, sot opozitarë, të cilët nuk kanë hequr dorë nga ky mentalitet, nga kjo mënyrë e funksionimit që ne para se të shohim se cili është interesi i shtetit të jemi të kujdesshëm që ta mos irritojmë Vuçiqin, të mos provokojmë situatë që do të mund të ngjallte diçka të ndjeshme, jo në bazë të asaj që a ke të drejtë apo jo ta bësh atë”, përfundoi Pozhari. /teve1.info/
