Analisti, Xhevdet Pozhari, ka thënë se propozimi i kryetarit të LDK, për një Qeveri nacionale të tranzicionit, është e dyta më qesharakja pas asaj të kreut të AAK-së, Ramush Haradinaj, i cili kishte propozua qeveri me rotacion.
Ai ka thënë se përgjigja e LDK-së, nuk paraqet kurrfarë qëndrimi politik.
“Pas idesë se asaj të Haradianaj se një vit do të qeverisi unë, një vit partia tjetër, kjo është ideja e dytë më qesharake që e dëgjojmë në opinion. Nuk paraqet kurrfarë qëndrimi politik, do ta kuptofsha nëse ajo letra do të përfundonte te ajo pjesa se ‘ju keni qenë përgjegjës për katër vite për këto’ dhe ne japim përgjigje definitive, qëndrojmë në opozitë”, ka thënë Pozhari në emisionin “Këndi i Debatit” në Tëvë1.
Ai ka thënë se qëndrimet e partive opozitare janë tendencë për grabitje të vullnetit demokratik.
“Nuk mendoj se kjo ka të bëjë me ruajtje të demokracisë, por me tendencën për grabitje të vullnetit demokratik dhe ky vullnet është shprehur me votë”, ka thënë Pozhari.
Ai ka thënë se edhe më herët ka pasur akuzua ndërmjet partive politike gjatë fushatës por janë bërë koalicione. Sipas tij, nëse LDK nuk dëshiron të bëjë koalicion me Vetëvendosjen tregon se është më e gatshme për një qeverisje me PDK-në dhe AAK-në.
Pozhari ka thënë se Lëvizja Vetëvendosje ka treguar interesim për zhbllokim të krizës dhe e hapur për bashkëpunim.
