Analisti Xhevdet Pozhari ka deklaruar se presidentja Vjosa Osmani mund të jetë figura që do të bashkonte Lidhjen Demokratike të Kosovës dhe Lëvizjen Vetëvendosje në garën për president.
I ftuar në emisionin “Këndi i debatit” në Tëvë1, Pozhari u shpreh se e sheh me rezervë një bashkim formal mes LDK-së dhe LVV-së, por shtoi se emri i Osmanit është më i përfoluri dhe potencialisht unifikues për të dy subjektet.
“Unë e shoh me rezervë bashkimin e LDK-së me LVV-në për zgjedhjen e kandidatit për president, sepse emri më i përfolur që mund t’i bëjë bashkë këto dy subjekte politike është Vjosa Osmani. Ajo mbetet një kandidaturë e imponuar dhe gëzon një përkrahje të gjerë”, ka thënë Pozhari.
Ai shtoi se nuk e përjashton mundësinë që kryetari i LDK-së, Lumir Abdixhiku, ta mbështesë një kandidaturë të tillë në rrethanat aktuale politike.
Sipas Pozharit, Osmani është presidentja e parë që kërkon një mandat të dytë, duke pasur një pozicion më të favorshëm për shkak të rolit institucional dhe mbështetjes publike.
“Është për herë të parë që një presidente kërkon mandat të dytë dhe e ka pasur shumë më të lehtë protagonizimin e saj dhe fushatën gjatë këtyre muajve, duke pasur në dispozicion të gjithë aparaturën shtetërore. Nuk ka fjalë të këqija për të”, u shpreh ai.
