Analisti politik Xhevdet Pozhari, në emisionin “Këndi i Debatit” në Tëvë1, ka komentuar mosmarrjen pjesë të opozitës në seancën e thirrur nga kryeparlamentari Dimal Basha, ku si pikë e rendit të ditës do të jetë miratimi i buxhetit për vitin 2026.
Pozhari tha se kjo lëvizje e opozitës nuk tregon pjekuri politike.
“Mendoj se kësaj radhe opozita është duke e bërë një lëvizje që për mua definitivisht nuk tregon pjekuri politike, sepse janë tema që nuk i kanë menaxhuar mirë, dhe sulmohet drejtpërdrejt ndaj qytetarëve.”
Analisti shtoi se nëse nuk gjendet bashkëpunim ose një gjuhë e përbashkët mes opozitës dhe Lëvizjes Vetëvendosje, mund të shkohet në zgjedhje, por buxheti duhet të miratohet:
“Nëse nuk gjen bashkëpunim ose nuk gjejnë një gjuhë të përbashkët opozita me LVV-në, cilatdo qofshin objektivat e tyre që të mos bëhet qeveria, le të shkojnë në zgjedhje, por buxhetin le ta votojnë, dhe mos ti fusim njerëzit në një krizë ku këta do të dalin dhe do të ngrisin gishtin ndaj njëri-tjetrit.”
Pozhari theksoi rëndësinë e bashkëpunimit institucional, duke sugjeruar se çështje si buxheti nuk duhet të përdoren si instrument i bllokadës politike.
