Konsulenti politik, Xhevdet Pozhari, nuk e përjashton mundësinë që gjatë seancës së nesërme të formohet qeveria e re, ndonëse vlerëson se një zhvillim i tillë do të ishte i papritur dhe me bazë të dobët politike.
Sipas tij, në politikë gjithmonë ka pasur befasi dhe mund të ndodhë që disa deputetë të ndryshojnë qëndrim në momentet e fundit.
“Nuk e përjashtoj si mundësi që nesër të formohet qeveria e re. Politika neve na ka mësuar që ka ndodhur në minutat e fundit ajo që më së paku e kemi pritur. Mund të ndodhë një gjë e tillë teorikisht, sidomos nëse ka deputetë që nuk duan t’i hynë edhe njëherë aventurës së zgjedhjeve”, ka deklaruar Pozhari në emisionin “Këndi i Debatit” në Tëvë1.
Ai shtoi se disa deputetë mund të votojnë për formimin e ekzekutivit të ri për shkak të mungesës së angazhimit të tyre në Kuvend, gjë që, sipas tij, mund t’u sjellë pasoja politike.
“Ata mund ta shohin seancën prej televizionit, sepse akoma nuk e kanë treguar punën – nuk kanë qenë të angazhuar nëpër komisione, nuk kanë shtjelluar debat dhe rrjedhimisht penalizohen”, ka theksuar Pozhari.
Megjithatë, ai paralajmëron se edhe nëse formohet, kjo qeveri do të jetë jostabile.
“Mund të ndodhë, edhe pse do të ishte një qeveri e brishtë deri në zgjedhjen e presidentit”, tha në fund Pozhari.
