Konsulenti politik, Xhevdet Pozhari, ka komentuar situatën politike në Mitrovicën e Jugut për zgjedhjet e nesërme lokale.
Sipas tij, gjatë katër viteve të fundit, narracioni në këtë komunë është përqendruar më shumë tek çështjet e veriut dhe ndikimi i strukturave paralele, përfshirë edhe Listën Serbe, sesa tek projektet konkrete zhvillimore.
Pozhari shprehet se qytetarët po përballen se nëse do të vazhdohet me ritmin aktual të qeverisjes apo do të rikthehen ide të së kaluarës, përfshirë edhe çështje si korrigjimi i kufijve.
“Mitrovica e Jugut, për atë çfarë kemi parë edhe përgjatë katër viteve të qeverisjes, është krijuar narracioni i çështjes së veriut. Pra, në një farë forme, aty më shumë sesa projektet është duke u folur nëse do të vazhdohet me këtë ritëm siç ka qenë deri më tash, duke përfshirë edhe çinstalimin e strukturave paralele dhe ndikimit të Listës Serbe, apo do të kthehen në të kaluarën, kur ka pasur ide nga më të ndryshmet, përfshirë edhe korrigjimin e kufijve. Pra, ky është narracioni. Nëse mitrovicalitë vendosin që mos të votojnë për LVV-në, atëherë do të thotë që kanë qenë më të kënaqur para katër viteve”, deklaroi ai në emisionin “Këndi i Debatit” në Tëvë1.
Komuna e Mitrovicës së Jugut nesër do të përballet me balotazhin mes kandidatëve: Faton Peci nga LVV-ja dhe Arian Tahiri nga PDK-ja. /teve1.info/
