Konsulenti politik, Xhevdet Pozhari, ka kundërshtuar analizën e ish-dipomatit, Tomorr Avdis, i cili tha se nga zgjedhje e 9 shkurtit, partia që më së shumti ka pasur rënie është LVV-ja.
Avdia deklaroi se LVV-ja i ka humbur 100 mijë vota, të cilat në zgjedhje te kaluara disa prej tyre kanë qenë të destinuara për presidenten Vjosa Osmani, disa nga qytetarët që kanë qenë të pavendosur e disa tha se i ka humbur shkaku i gjuhës që ka përdorur kryeministri Albin Kurti gjatë fushatës.
Pozhari, kundërshton këtë analizë, duke përmendur faktin që nuk mund të konsiderohen 100 mijë vota të humbura përderisa nuk janë votuar akoma votat e mërgimtarëve dhe ato me kusht.
“S’po pres që VV-ja t’i marrë 80 për qind të votat ashtu siç i ka marrë në zgjedhjet e kaluara. Mirëpo, në zgjedhjet e kaluara kanë qenë 50 mijë vota të diasporës, tashmë janë 84 mijë. Pra, edhe nëse merr përqindjen më të ulët sa i përket votave numerikisht ato do të jenë më shumë dhe nëse i shtohen kësaj shifre përfshirë edhe votat me kusht nuk do të jetë ajo rënia prej 100 mijë votave. Prandaj, e kontestova analizën, shkaku që do të kemi një pasqyrë tjetër në fund të procesit”, tha ai në emisionin “Këndi i Debatit” në Tëvë1.
Pozhari tha se nga këto zgjedhje LVV-ja ka dalë e para në të gjitha komunat, përveç në Drenas e Skenderaj.
“Thuajse në të gjitha komunat shqiptare, përjashto Drenasin dhe Skenderajn, ka qenë bindshëm LVV-ja e para. Në raste të caktuara edhe me mbi 50 për qind të votave”, deklaroi ai./teve1.info/
