Konsulenti politik, Xhevdet Pozhari, ka analizuar garën për kryetar të Prishtinës, duke vlerësuar se kandidati i Vetëvendosjes, Hajrulla Çeku, ka gjasa të mira për fitore në raundin e dytë të zgjedhjeve lokale.
Pozhari tha se arsyeja kryesore pse Çeku mund të ketë epërsi është fakti se përballë e ka Përparim Ramën, i cili tashmë ka qenë në pushtet dhe, sipas tij, ka bërë disa lëshime gjatë qeverisjes në kryeqytet.
“Dua të them një gjë që s’e kam thënë më parë sa i përket Prishtinës. Unë i shoh gjasat shumë të mira Hajrulla Çekut, pikërisht për shkakun se ka përball Përparim Ramën, sikur të ndodhte të kishte Uran Ismailin, i fundit do të ishte më favorit, sepse është diçka e pa provuar në qeverisje. Pra, nëse ka diçka fat në këto zgjedhje Çeku është që është përball një kandidati e kryetari i cili ka shumë lëshime në këtë qeverisje”, deklaroi ai në emisionin “Këndi i Debatit” në Tëvë1.
Përndryshe, sipas Pozharit, Çeku, në garë me Uran Ismailin e PDK-së do të ishte më defanziv. /teve1.info/
