Gjatë ditës së sotme do të përcaktohen dy kombëtaret tjera që do të avancojnë në çerekfinale të Kampionatit Evropian “Gjermania 2024”.
Në mbrëmje, prej orës 21:00, Portugalia do të përballet me Slloveninë, ndeshje kjo e 1/8 së finales që do të luhet në Frankfurt.
Sigurisht, Portugalia llogaritet favorite për të avancuar tutje por Sllovenia ka treguar paraqitje të mira në fazën e grupeve.
Nuk e regjistroi asnjë humbje në kuadër të Grupit C, në të cilin përfundoi e treta me tri pikë të tubuara pasi barazoi në të trija ndeshjet.
Në anën tjetër, Portugalia ishte e para në grupin e saj me 6 pikë, falë dy fitoreve dhe një disfate, të cilën ia shkaktoi Gjeorgjia në ndeshjen e fundit.
Sulmit të Portugalisë në këtë përballje, padyshim se do t’i prijë ylli Cristiano Ronaldo që ishte i pazëvendësueshëm në fazën e grupeve.
Po ashtu, Ronaldo synon edhe golin e parë në “Euro 2024” ndaj Sllovenisë për ta ndihmuar Portugalinë që të avancoj tutje.
Ndërkohë, prej orës 18:00 nis ndeshja tjetër e 1/8 së finales ndërmjet Francës dhe Belgjikës.
Fituesi i duelit Francë – Belgjikë do të përballet në çerekfinale me fituesin e ndeshjes mes Portugalisë dhe Sllovenisë.