Portugalia njohu zyrtarisht shtetin e Palestinës, njoftoi të dielën në Nju Jork ministri i jashtëm i vendit.
Ministri i Jashtëm Paulo Rangel njoftoi njohjen zyrtare të Palestinës nga vendi i tij në Misionin e Përhershëm të Portugalisë në Nju Jork, raportoi transmetuesi i vendit RTP.
Rangel bëri thirrje gjithashtu për lirimin e të gjithë pengjeve, ndërprerjen e të gjitha armiqësive dhe vendosjen e një armëpushimi në Gaza, shkruan Anadolu.
Deklarata e sotme e njohjes është një rezultat i drejtpërdrejtë i vendimit të Këshillit të Ministrave më 18 shtator, i marrë në kulmin e një procesi konsultimi në të cilin presidenti i republikës dhe shumica dërrmuese e partive me vende në parlament ranë dakord, shtoi ai.
Më parë, Presidenti Marcelo Rebelo de Sousa shprehu mbështetjen e tij të plotë për vendimin e qeverisë për të njohur Palestinën.
Kjo ndodhi disa orë pasi Mbretëria e Bashkuar, Kanadaja dhe Australia njohën zyrtarisht shtetin e Palestinës përpara Asamblesë së Përgjithshme të OKB-së.
Më parë, Franca, Luksemburgu dhe Malta njoftuan plane të ngjashme për të njohur Palestinën në Asamblenë e Përgjithshme të OKB-së javën e ardhshme.
