Turqia duhet të kalojë dy pengesa tepër të vështira për t’u kualifikuar në Katar 2022. Në fillim Portugalia dhe më pas fituesi i çiftit Itali-Maqedonia e Veriut. Sfida ndaj kombëtares luzitane do të zhvillohet sonte në Estadio do Dragao (20:45) dhe do të transmetohet në Supersport 1.
Kapiteni i Turqisë, Burak Yilmaz e pranon se portugezët janë favoritë, por ai dhe shokët e skuadrës kanë diçka që i mungon luzitanëve. “Të luajmë në Porto është shumë e vështirë për ne, por avantazhi ynë i madh është se jemi turq, nuk dorëzohemi kurrë”, thekson sulmuesi i Lille, ekip me të cilin fitoi titullin në Francë sezonin e kaluar.
36-vjeçari vazhdon edhe më tej prononcimin e dhënë për Record, duke analizuar sfidën e mbrëmjes së sotme ndaj ekipit të Cristiano Ronaldos. “Duhet të luajmë me zemër, por edhe të përdorim trurin.
Portugalia është favorite për të vazhduar më tej, por askush nuk duhet të dyshojë në ambicien dhe vendosmërinë tonë”, deklaroi Burak Yilmaz, autor i 30 golave në 76 ndeshje të zhvilluar me kombëtaren turke.
