Portugalia tashmë është kualifikuar në fazën nokaut të “Euro 2024” por mund ta mbyll fazën e grupeve me tri fitore në po aq ndeshje kur të mërkurën do të përballet me Gjeorgjinë.
Kjo ndeshje luhet në orën 21:00, ndërsa Cristiano Ronaldo pritet të jetë startues te Portugalia. Portugalia i prinë Grupit F me 6 pikë, ndërsa Gjeorgjia ka një pikë dhe po synon që në ndeshjen e fundit ta siguroj kalimin në fazën tjetër.
Krahas Gjeorgjisë, kalimin tutje e kërkojnë edhe Turqia e Çekia, të cilat do të përballen po ashtu prej orës 21:00 por në qytetin e Hamburgut.
Turqia është e dyta në grup me tri pikë, ndërsa Çekia ka një pikë dhe zë vendin e tretë. Çekia mund të jetë pa sulmuesin Patrik Schick në këtë ndeshje pasi pësoi një lëndim në duelin me Gjeorgjinë. Ndërkohë, prej orës 18:00 do të zhvillohen ndeshjet e fundit të Grupit E që është plotësisht i paqartë pasi të gjitha ekipet janë në garë për t’u kualifikuar.
Sllovakia do të përballet me Rumaninë, ndërsa Ukraina me Belgjikën.
Të gjitha ekipet e këtij grupi i kanë nga tri pikë të tubuara pas dy ndeshjeve të luajtura.
