Federata e Futbollit e Kosovës vazhdon ndarjen e çmimit “Ylli i Javës”, pas çdo xhiroje në Superligë. Çmimi i më të mirit për javën e tetë i ka takuar portierit të FC Trepça ’89, Marly Prince.
Vlerësimi për me të mirin është bërë nga komisioni i veteranëve të futbollit në përbërje me Muhamet Sylejmani – KFV Mitrovica, Jeton Shehu – KFV Besa dhe Vllaznim Visoka – KFV Llapi.
Komisioni vlerësoi se portieri i 89-shit, ishte më i merituari që skuadra e tij realizoi fitore kundër Dukagjinit (3:0), duke e mbajtur portën e tij të pamposhtur. Ai gjatë lojës u tregua shumë i shkathtë në pesë intervenime kyçe, të cilat ndikuan në rrjedhën e lojës.
Marly Prince pranoi çmimin sot, pas kthimit nga vendlindja e tij, ku ishte i grumbulluar me Kombëtaren e Kongos. Prince nënvizoi se ndihet shumë i vlerësuar, dhe se pret shumë nga skuadra e tij në këtë edicion.
“Jam shumë i lumtur të pranoj sot trofeun e më të mirit të xhiros. Si lojtar i Trepçës ‘89, pres që si ekip i mirë dhe i kompletuar që jemi të fitojmë kampionatin dhe pse jo të jemi pjesë e Ligës së Kampionëve në vitin e ardhshëm. Me këtë rast dua të falënderoj shumë stafin dhe bashkëlojtarët për këtë trofe, sepse pa kontributin e tyre ky çmim do të ishte i pamundur të fitohej”, ka theksuar Prince për faqen zyrtare të FFK-së. /Tëvë1/
