Portieri i skuadrës së Gjilanit, Kenan Haxhihamza e ka fituar epitetin e lojtarit më të mirë për xhiron e 23-t të Superligës së Kosovës në futboll.
Federata e Futbollit të Kosovës (FFK), ka njoftuar të hënën, se Haxhihamza e ka fituar çmimin “Ylli i Javës”, të cilin e ka fituar për herë të dytë këtë sezon.
Komisioni i Veteranëve të futbollit, e ka vlerësuar Haxhihamzën si më të mirin e javës pas paraqitjes fantastike që e pati në fitoren e Gjilanit ndaj Feronikelit ’74.
Gjilani triumfoi 1:0 kurse Haxhihamza ishte më i merituari për këtë fitore, pasi në fund të takimit priti një penallti dhe gjatë tërë takimit u shqua me pritje vendimtare.
Pasi mori çmimin, Haxhihamza u shpreh i lumtur që u vlerësua më i miri i javës, duke shtuar se shpreson që Gjilani të vazhdoj me formën e mirë për të siguruar një vend në garat evropiane.
Ai shpreson që ta arrij këtë objektiv me Gjilanin, ekip që në pesë ndeshjet e fundit në Superligë ka regjistruar katër fitore e një barazim, duke u ngjitur në pozitën e katërt në tabelë me 34 pikë të mbledhura.
