Të enjten, Kurti e Vuçiq kishin takime të ndara me liderë e udhëheqës të BE-së, në kuadër të një samiti të kësaj të fundit.
Pas një maratonë takimesh ata nuk arritën pajtim sa i përket draftit evropian për Asociacionin e komunave me shumicë serbe.
Ndonëse kryeministri kosovar, u shpreh i gatshëm ta nënshkruajë atë, pala serbe refuzoi.
Njohësi i rrethanave politike, Arbnor Sadiku thotë se Kurti nuk pati rrugë tjetër pos pranimit.
“Natyrisht që kryeministri Kurti këtë e bën për faktin se në opozitë këtë e ka shfrytëzuar për të ardhur në pushtet, tani më për t’i neutralizuar militantët e tij ose Lëvizjes Vetëvendosje. Pra e bën që të duket një asociacion I pranueshëm së pari për partinë e tij, e mandej për opinonin më të gjerë, mediat dhe opozitën në Kosovë”, tha Sadiku.
E politologu, Fidan Ukaj, thotë se mbetet të shihet nëse drafti është në frymën kushtetuese të Kosovës.
“Asociacioni ose siç thonë ata propozimi i BE-së drafti evropian është në frymën e Gjykatës Kushtetuese, mendoj se kjo është arsyeja se pse Z.Kurti mund ta ketë pranuar në parim këtë draft të propozuar nga BE-ja dhe mbetet të shihet se çfarë përmban në fakt drafti në vetvete dhe a është në frymën e Gjykatës Kushtetuese”, tha Ukaj.
Televizioni ka tentuar të marrë informacione nga Qeveria e Kosovës në lidhje me atë se çfarë kishte ndryshe në draftin evropian për Asociacionin që u pranua nga Kurti, por nuk kanë kthyer përgjigjeje deri në publikimin e kronikës.
