Mesfushori i Kombëtares së Kosovës, Lindon Emërllahu tashmë është futbollisti më i ri i skuadrës nga Ukraina, Polissya Zhytomyr.
Ekipi që është pjesë e elitës së futbollit ukrainas, të enjten e ka prezantuar Emërllahun, i cili te FC Polissya do ta bartë fanellën me numrin 14.
Emërllahu me ekipin e ri ka firmosur kontratë trevjeçare, ndërsa te Polissya Zhytomyr është transferuar nga Cluji i Rumanisë.
“Këtë sezon mesfushori luajti 24 ndeshje, duke i shënuar katër gola dhe duke i bërë dy asistime për CFR Cluj në Rumani. Emërllahu është reprezentues i Kosovës. Ka luajtur 12 ndeshje për ekipin nacional, duke shënuar një gol”, ka shkruar klubi ukrainas në prezantimin e Emërllahut.
Për transferimin e Emërllahut, Polissya thuhet se i ka paguar Clujit 1.5 milionë euro kurse mesfushori do të ketë pagë vjetore që shkon deri në 500 mijë euro me bonuse.
Emërllahu në shkurt të këtij viti iu bashkua Clujit nga Ballkani për 700 mijë euro, ndërsa për ekipin nga Rumania, kampionat ku 23-vjeçari ishte prej mesfushorëve më të mirë, ai ka regjistruar 41 ndeshje në total.
Krahas Emërllahut, Polissya Zhytomyr në afatin kalimtar të dimrit synon edhe transferimin e futbollistit tjetër të Kosovës, mbrojtësit Ilir Krasniqi, i cili është pjesë e skuadrës Kolos që po ashtu garon në Superligën e Ukrainës.
