Përmes një njoftimi për media nga FSK-ja gjatë realizimit të këtyre stërvitjeve Forcat ushtarake të Kosovës dhe ato të Shqipërisë u fokusuan më shumë në aktivitet nga fusha e mbrojtjes së afërt.
“Policia ushtarake e Forcës së Sigurisë së Kosovës ( FSK ) dhe ajo e Forcave të Armatosura të Republikës së Shqipërisë ( FARSH ) gjatë javës që lamë pas kanë përfunduar stërvitjen e përbashkët ushtarake në Republikën e Shqipërisë. Gjatë realizimit të këtyre stërvitjeve Forcat ushtarake të Republikës së Kosovës dhe ato të Republikës së Shqipërisë u fokusuan më shumë në aktivitet nga fusha e mbrojtjes së afërt, ngritja e pikave te kontrollit dhe përcjellja e konvojit me mjete të rrezikshme”, thuhet në njoftim.
Sipas njoftimit, pjesë e trajnimit ishin një tog i Policisë ushtarake të FSK-së dhe një i FARSH-së.
“Pjesë e trajnimit ishin një tog i Policisë Ushtarake të FSK-së dhe një i FARSH-së, të cilët përfituan njohuri të reja nga përvojat dhe eksperiencat e shumta që treguan gjatë realizimit të stërvitjeve”, është bërë e ditur në komunikatën e FSK-së.
Ndërkaq, stërvitja ushtarake është realizuar në kuadër të bashkëpunimit bilateral mes MB-së së Kosovës dhe asaj të Shqipërisë.
“Stërvitja ushtarake u realizua në kuadër të bashkëpunimit bilateral në mes të Ministrisë së Mbrojtjes të Republikës së Kosovës dhe asaj të Ministrisë së Mbrojtjes të Republikës së Shqipërisë më qëllim të ngritjes së nderveprueshmerise në mes të dy ushtrive”, thuhet më tej në njoftim. /teve1.info/
