Ditën e mërkurë, linja e autobusëve Podujevë – Prishtinë nuk e filloi si zakonisht.
Kjo për shkak se me të dalë në Trudë, ata u ndalën nga policia.
Aty po i prisnin edhe inspektorët,të cilët i dënuan me gjoba dhe i paralajmëruan të mos hyjnë më direkt në Prishtinë.
“Sot është dal Komuna me inspektorë dhe polici te ‘Xhamia e Llapit’ edhe në ‘Trudë’ dhe na kanë thanë s’keni të drejtë më hy më nga ‘Truda’ direkt në autoban edhe në stacion të autobusëve. Nuk keni të drejtë as tek ‘Sharbanët’, as te ‘Xhamia e Llapit,’ as kërkund hiç tjetër nëpër qytet.00:36-01:04Në atë moment që na është dhënë si vërjetje prej policisë e disa kompani i kanë dënuar na jemi të certifikuar prej Ministrisë së Transportit që secila kompani i ka të caktuar minutat se kur me u ndal të ‘Sharbant’ e ku diku tjetër. Na nuk jemi tu e kuptuar se çfarë jemi duke i bërë Komunës së Prishtinës ose çfarë është arsyeja ose Ministria e Transportit nuk na ka informuar kërkush për këto”, thotë Mentor Mustafa, nënkryetar i Shoqatës së Transportit të Podujevës.
E në shenjë revolte që nuk u informuan për këtë ndryshim, të njëjtit u parkuan para Komunës së Prishtinës.
“Qysh tash po shkojmë e po i parkojmë autobusët para Komunës së Prishtinës edhe po protestojmë qysh nuk na kanë paralajmërua ata neve, për asnjë gjë në këtë drejtim për vendimet e tyre ashtu edhe na kemi marr vendim me kryesi për me dal me u parku te ‘Xhamia e Llapit’ apo para Komunës ku te mundemi. Dhe nuk e kemi ndërmend me vazhdu punën deri sa të merret ndonjë vendim që na kemi të drejtë me marr e me zbrit udhëtar të ‘Xhamia e Llapit’, shprehet Sadat Kurtolli, pronar i një kompanie të autobusëve.
Të kundërtën e thonë nga Komuna.
“Njoftimi ka dal nga kabineti i kryetarit dhe janë njoftuar të gjitha njësitë apo institucionet përkatëse që merren me mbikëqyrjen dhe monitorimin e transporti publik në kryeqytet ku ata në bazë të rregullave dhe ligjeve që i kanë në fuqi kanë dal dhe i kanë detyrë që të respektojnë vendimin e kryetarit”, thotë Halil Halili u.d udhëheqës i sektorit për transport dhe trafik në Prishtinë.
Shoqata e Transportit të Podujevës kishte protestuar edhe rreth dy javë më parë, kundrejt disa linjave të autobusëve që ka lëshuar në qarkullim Komuna e Prishtinës.
Televizioni ka dërguar pyetje edhe në Ministrinë e Mjedisit, Planifikimit Hapësinor dhe Infrastrukturës për këtë çështje mirëpo të njëjtit deri në momentin e publikimit të kronikës nuk kanë kthyer përgjigje.
