Policia e Kosovës ka njoftuar se ka realizuar me sukses një transferim të një të dënuari nga Italia për në Kosovë dhe tri ekstradime nga vende të ndryshme drejt Kosovës.
Siç bëhet e ditur në njoftim, me datë 16.03.2026 është transferuar nga Italia për në Kosovë, shtetasi i Kosovës S.S., i dënuar në shtetin e Italian për vepra të rënda penale në fushën e narkotikëve.
I njëjti pas transferimit iu dorëzua shërbimit korrektues të Kosovës për të vuajtur pjesën e mbetur të dënimit prej 16 vjet e 4 muaj burgim, pasi që një pjesë të dënimit e kishte vuajtur në shtetin Italian.
Me datën 18.03.2026 është ekstraduar nga Shqipëria për në Kosovë shtetasi kosovar L.V., pasi që i njëjti kërkohej me urdhër arrest ndërkombëtar lëshuar nga institucionet e drejtësisë, i përfshirë në veprën penale ‘Legalizimi i përmbajtjes së rreme’ dhe i ishte shmangur drejtësisë.
Po ashtu, policia bën të ditur se në të njëjtën ditë është ekstraduar nga Gjermania në Kosovë shtetasi F.G., i kërkuar me urdhër arrest ndërkombëtar për veprën penale ‘Grabitja’, i dënuar me burgim efektiv prej 1 viti.
Pas ekstradimit të dyshuarit iu dorëzuan njësiteve përkatëse të policisë DHKEK-DRP Mitrovicë Jugu përkatësisht rajonit të Prizrenit.
Ndërkaq, me datën 19.03.2026 është ekstraduar nga Gjermania në Kosovë shtetasi F.A., i kërkuar me urdhër arrest ndërkombëtar për veprat penale Shkaktim i rrezikut të përgjithshëm dhe Përdorim i armës apo mjetit të rrezikshëm.
Pas ekstradimit, i dyshuari është dorëzuar tek njësia përkatëse policore nga DRP Mitrovica Jug për procedim të mëtejshëm.
“Transferimi dhe ekstradimet u realizuan falë bashkëpunimit mes institucioneve të Republikës së Kosovës dhe shteteve partnere ndërkombëtare”, bëhet e ditur në njoftim.
