Policia e Serbisë bastisi zyrat e të paktën katër organizatave të shoqërisë civile të martën, si pjesë e një hetimi mbi akuzat për abuzim të fondeve të Agjencisë Amerikane USAID.
Prokurori i shtetit Nenad Stefanoviç tha se Serbia i ka kërkuar Departamentit të Drejtësisë të ShBA-ve informacione në lidhje me abuzimin e mundshëm të fondeve dhe pastrimin e parave në lidhje me fondet e USAID-it në Serbi.
Një departament i posaçëm kundër korrupsionit i ka kërkuar policisë që “të mbledhë informacionin e nevojshëm për të kontrolluar informacionin dhe për të mbledhur prova në lidhje me dyshimet për shpenzime jo të synuara të fondeve të USAID-it, abuzimin e fondeve dhe pastrimin e mundshëm të parave,” tha Stefanoviç.
Policia ka marrë për detyrë të mbledhë të gjithë dokumentacionin në lidhje me donacionet e USAID-it nga katër organizata joqeveritare, tha ai.
Dy nga OJQ-të, Qendra për Kërkim, Transparencë dhe Përgjegjësi me qendër në Beograd, ose CRTA, dhe grupi i Iniciativave Qytetare konfirmuan se forcat e policisë ishin në zyrat e tyre të martën, raporton AP.
Iniciativat Qytetare e përshkroi bastisjen në një deklaratë si një “sulm serioz ndaj të drejtave themelore qytetare dhe një vazhdim i presionit të paligjshëm ndaj shoqërisë civile në Serbi”.
“Përdorimi i policisë për qëllime politike paraqet abuzim të ashpër të institucioneve shtetërore për të goditur ata që mendojnë ndryshe dhe mbyt aktivitetet e lira dhe demokratike në Serbi”, thuhet në deklaratë.
