Në njoftim thuhet se 4 kuaj ishin futur në territorin e Kosovës përmes rrugës ilegale.
“Si rezultat i kësaj, me datën 05.05.2022, në orët e mbrëmjes, bazuar edhe në analizën e rriskut dhe informacioneve inteligjente të bëra nga ana e njësive të Policisë kufitare është arritur të identifikohen katër (4) kuaj të cilët ishin futur në territorin e Republikës së Kosovës nga Republika e Maqedonisë Veriore, dyshohet përmes rrugëve ilegale, të cilët ishin të ngarkuar me duhan të papërpunuar”, thuhet në njoftim.
Tutje policia njofton se kuajt kishin pasur destinacion shtëpinë e të dyshuarit Z.N, në fshatin Lubishtë.
“Duke u bazuar në informacione inteligjente, ngarkesa së bashku me kafshët-kuajt, kishin pasur destinacion shtëpinë e personit të dyshuar Z.N., në fshatin Lubishtë, Komuna e Vitisë, me qëllim të ri- ngarkesës në një automjet me targa vendore”, thuhet në njoftim.
Policia bëri të ditur se shtëpia e pabanuar është bastisur, ku edhe ishte gjetur edhe një sasi e duhanit të papërpunuar.
“Pas konsultimeve me prokurorin kompetentë, është bastisur edhe shtëpia e pabanuar, me ç ‘rast në një nga hapësirat e saj, janë gjetur edhe një sasi e konsiderueshme e mallit të njëjtë – duhan i papërpunuar. Në total janë gjetur 34 thasë duhan ‘refuz ‘të papërpunuar mbi 500 (pesëqind) kilogramë dhe 94 (nëntëdhjetë e katër) paketime duhan (rreth 1 kg.) e që bën rreth 94 kg. në total”, thuhet në njoftim.
Duhani i konfiskuar do t’i kthehet Doganës së Kosovës, kurse me rastin është duke u marrë Njësia e Hetimeve Rajonale e Drejtorisë Kufitare-Lindje. /teve1.info/
