Policia tha se ishin familjarët e A.L, 36- vjeç të cilët ngritën alarmi se djali i tyre ishte nisur të kryente një krim të rëndë.
36-vjeçari ishte i veshur me rroba ushtarake, me antiplumb dhe në çante i janë gjetur armë të mbushura gati për qitje dhe municione të tjera.
Policia e Shtetit thotë se pas marrjes së informacioneve të siguruara nga inteligjenca policore por edhe familjarët e të dyshuarit kanë nisur aksionin hetimor, ku është arrestuar i dyshuari.
“Në kuadër të këtij operacioni u bë kapja dhe arrestimi në flagrancë i shtetasit:- A. L. 36 vjeç, për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Prodhimi dhe shitja e lëndëve narkotike”, “Prodhimi, mbajtja, blerja apo shitja pa leje e armëve të ftohta” dhe ‘Përgatitja e kushteve për vrasje’”, thuhet në komunikatë.
Gjatë kontrollit të ushtruar në automjetin e tij, shërbimet e Policisë gjetën dhe sekuestruan në cilësinë e provës materiale: 1 armë zjarri pistoletë me 5 karikatorë, 1 automatik me 5 karikatorë, 550 fishekë luftarakë për pistoletën dhe automatikun, 1 palë dylbi, 1 antiplumb ushtarak, 1 thikë, 1 çantë ushtarake, 75 gramë lëndë e dyshuar narkotike kanabis dhe rroba kamuflazhi.
Për shkak të sekretit hetimor, policia nuk dha detaje të tjera në lidhje me motivet dhe objektivin e synuar nga i arrestuari.
