Policia e Kosovës ka nisur një fushatë të shtuar kontrolli në trafikun rrugor në rajonin e Mitrovicës së Jugut, nën moton “Mos lejo që shpejtësia të të udhëheq”, me qëllim rritjen e sigurisë dhe parandalimin e aksidenteve.
Sipas njoftimit zyrtar, njësitet policore po zhvillojnë kontrolle të vazhdueshme në rrugë, duke përdorur radarë dhe vetura të pajisura me teknologji për identifikimin e kundërvajtjeve në trafik.
Përveç masave kontrolle, zyrtarët policorë shpërndajnë fletushka dhe mesazhe informuese që përmbajnë këshilla për sigurinë rrugore, si respektimi i kufizimeve të shpejtësisë, vendosja e rripit të sigurisë dhe respektimi i sinjalizimit rrugor.
Policia apelon tek të gjithë pjesëmarrësit në trafik të respektojnë rregullat për të parandaluar aksidentet dhe për të ruajtur jetën e qytetarëve.
