Policia e Kosovës ka shpërndarë sot disa dhurata për fëmijët në prag të festave të fundvitit. Nga ky institucion thonë se kjo bëhet me qëllim të afrimit të qytetarëve me Policinë por edhe forcimin e raporteve mes tyre.
Detyrë e tyre kësaj radhe nuk ishte shqiptimi i gjobave për shkelje të rendit.
Zyrtarët policorë të premten e fundit të 2024-ës po i ndalojnë prindërit me fëmijë në kryeqytet për t’u dhënë atyre dhurata në prag të festave të fundvitit.
E gëzimin për këtë veprim ata po e shfaqin përmes buzëqeshjeve të tyre.
Nën-kolonele Zylfije Dema, tregon qëllimin e këtij aktiviteti që sipas saj synon të përçojë mesazhe pozitive tek fëmijët.
“Do t’i ndalim veturat dhe aty ku ka fëmijë do t’i shpërndajmë dhurata ku është një mesazh që Policia është përtej një institucioni për mbrojtje dhe siguri kështu që e tregon që Policia është e këtij populli dhe ne do të punojmë së bashku për t’iu ofruar mbrojtje dhe siguri që të kalojnë një fundvit pa shqetësim”, tha ai.
Ajo thotë se aktivitete të tilla janë të mirëseardhura dhe kanë efekt pozitiv tek qytetarët.
“Jemi duke shpërndarë te fëmijët e SOS fshatit, HANDIKOS-it, Sindrom Down, dhe te fëmijët e komunitetit… Këtu ka një impakt shumë pozitiv sidomos raporti Polici-qytetar sepse kryesisht dhuratat ndahen tek fëmijët me nevojë që ata fëmijë e ndijnë veten shumë të gëzuar që edhe Policia është në mbrojtje dhe mbështetje të tyre”
Një aktivitet i tillë është mbajtur edhe në komunat tjera të Kosovës, ku janë shpërndarë dhurata tek fëmijët nëpër qytete të ndryshme.
