Policia e Kosovës në Ferizaj, në koordinim me Prokurorinë Themelore në Ferizaj, ka arrestuar sot në flagrancë një person të dyshuar për veprën penale të fajdesë.
Sipas njoftimit të Policisë, i dyshuari dyshohet se, me qëllim të përfitimit të kundërligjshëm pasuror, ka lidhur marrëveshje për një shumë dukshëm joproporcionale në këmbim të dhënies së borxhit. Ai dyshohet se ka shfrytëzuar gjendjen e rëndë financiare të viktimës, duke e ngarkuar atë me kamatë në kundërshtim me ligjin.
Lidhur me rastin janë ndërmarrë të gjitha veprimet e nevojshme procedurale. Pas intervistimit, me vendim të prokurorit kompetent, i dyshuari është ndaluar për procedura të mëtejme hetimore.
