Tifo-grupi “Tifozat Kuq e Zi” vazhdon që publikisht të kundërshtoj organizimin e përbashkët të Evropianit U21 të vitit 2027 nga Shqipëria dhe Serbia.
Një baner që kundërshton këtë organizim, ku shkruante “FSHF JO EURO 2027 ME shkije”, disa tifozë e shfaqën të shtunën mbrëma në ndeshjen e futsallit mes Shqipërisë dhe Danimarkës. Kjo ndeshje u zhvillua në Rahovec, ndërsa TKZ ka publikuar fotografinë në faqen e saj.
Por tifozët, tetë gjithsej, janë intervistuar nga Policia e Kosovës për shfaqjen e atij baneri. Kjo bëhet e ditur nga raporti ditor i policisë.
“Është raportuar se kah fundi i ndeshjes kualifikuese në futsall, Shqipëri- Danimarkë, një grup tifozësh (tetë), të dyshuar meshkuj kosovarë, kanë shfaqur një baner me mbishkrim ‘FSHF- JO EURO 2027 ME SHKIJE’. I njëjti është larguar nga sigurimi ndeshjes. Të dyshuarit janë intervistuar dhe me vendim të prokurorit janë liruar, rasti nën hetime”, shkruan në raportin e policisë.
Ky grupim tifozësh vazhdimisht kundërshton atë që tashmë është vendosur nga UEFA. Në vitin 2027, Evropiani i futbollistëve deri në 21 vjet do të organizohet në Shqipëri dhe Serbi.
Në ndeshjen në palestrën “Mizahir Isma” në Rahovec, Shqipëria u mposht 5:3 nga Danimarka. Ishte ndeshja e fundit e raundit kryesor të kualifikimeve për Euro 2026. Shqipëria mbeti e fundit në grup.
Nga gjashtë ndeshje kishte një fitore dhe nuk u kualifikua.
Për Shqipërinë në futsal luajnë shumë futbollistë nga Kosova. FSHF-ja nuk ka njoftuar pse vendosi që ndeshja të zhvillohet në Rahovec.
