Policia e Kosovës sot është duke zhvilluar një aksion në disa qendra në veri të Mitrovicës, pasi dyshohet që katër zyrtarë të QPS-së para zgjedhjeve të 9 shkurtit kanë thirrur në telefon qytetarë dhe nën formën e kërcënimit i kanë udhëzuar se si të votojnë.
Zv.komandanti për veriun, Veton Elshani për Tëvë 1 ka deklaruar se ata janë kërcënuar duke i kushtëzuar ndihmat sociale me votën e tyre në favor të një partie të caktuar politike.
Tutje, ai ka thënë se të njëjti janë arrestuar më 8 shkurt dhe në lidhjen me rastin është njoftuar Prokuroria Themelore në Mitrovicë.
Elshani tha se më leje të Gjykatës janë duke u kryer kontrolle.
“Në fakt këta zyrtar të Qendrës për Pune Sociale e cila ishte në strukture paralele/ilegale dyshohej se kanë thirre qytetarë të ndryshëm në telefon dhe nën formën e kërcënimit i kane detyruar apo udhëzuar se si te votojnë duke i kushtëzua ndihmat sociale me votën e tyre në favor të një partie të caktuar politike e cila ishte në garë për zgjedhjet parlamentare në Kosovë. Lidhur me punën tonë hetimore ne e kemi njoftu Prokurorin Themelore në Mitrovicë nga të cilët kemi kerku që të na lejohet kontrolli i këtyre qendrave me qëllim të zbulimit të provave me të cilat do te vërtetohet saktë mënyra e veprimit të këtij aktiviteti te kundërligjshëm e që cilësohet si falsifikim i dokumenteve”, ka deklaruar ai.
Më tej, Elshani ka thënë se pas kontrolleve do të njoftojnë prokurorinë për të gjeturat dhe më tej do të vendosët për hapat e mëtutjeshëm.
