Policia e Kosovës ka zhvilluar një varg ligjëratash sensibilizuese dhe edukative në shkolla të ndryshme të vendit, me qëllim të parandalimit të trafikimit me qenie njerëzore.
Siç bëhet e ditur në njoftim, aktivitetet janë realizuar nga zyrtarët e Njësisë për Hetimin e Trafikimit me Qenie Njerëzore, në kuadër të Strategjisë Kombëtare kundër Trafikimit me Njerëz dhe Planit të Veprimit për zbatimin e saj.
Gjatë periudhës 18 tetor-18 nëntor 2025, policia thuhet se ka mbajtur ligjërata në 49 shkolla fillore dhe të mesme në të gjitha rajonet e Kosovës, ku kanë marrë pjesë rreth 1 mijë e 585 nxënës, së bashku me mësimdhënësit e tyre.
Fokus i këtyre ligjëratave ka qenë informimi i të rinjve për rreziqet e trafikimit me njerëz, format e shfrytëzimit seksual, si dhe rëndësia e identifikimit dhe raportimit të hershëm të rasteve të dyshuara.
Ndërkohë, aktivitete të ngjashme janë mbajtur edhe me profesorët e shkollave në Pejë, Gjakovë dhe Gjilan, në bashkëpunim me koordinatorët e prokurorive themelore, drejtoritë komunale të arsimit, mbrojtësit e viktimave, Qendrat për Punë Sociale, Shërbimin Sprovues dhe organizatat joqeveritare.
Qëllimi ishte rritja e kapaciteteve të stafit arsimor për të identifikuar dhe referuar me kohë çdo rast të mundshëm të trafikimit.
