Policia e Kosovës ka konfirmuar arrestimin e personit të katër që dyshohet për vrasjen e Liridona Ademajt.
Policia thotë se me vendim të prokurorit i dyshuari është dërguar në mbajtje.
“VRASJE E RËNDË- Rr. Dalip Alshiqi, Prishtinë / 29.11.2023 – 20:18. Lidhur me rastin, është identifikuar dhe arrestuar edhe një i dyshuar mashkull kosovar. I dyshuari me vendim të prokurorit është dërguar në mbajtje”, thuhet në raportin e Policisë së Kosovës.
Ndërkohë, në një përgjigje për teve1.info, zëdhënësja e Prokurorisë Themelore në Prishtinë, Laureta Ulaj, bëri të ditur se i arrestuari dyshohet për veprën penale “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse”.
Liridona Ademaj u vra natën e 29 nëntorit, kurse bashkëshorti i saj, Naim Murseli dyshohet se e ka organizuar vrasjen bashkë me Granit Plavën dhe Kushtrim Kokallën. Të njëjtëve, Gjykata Themelore në Prishtinë u ka vendosur nga një muaj paraburgim./teve1.info/
