Policia e Kosovës kërkon ndihmën e qytetarëve për gjetjen e Enver Sekiraqës, pasi që i njëjti është arratisur pas vendimit të Gjykatës së Apelit, e cila e kishte kthyer në paraburgim.
Enver Sekiraqa ishte i dënuar për veprën penale “shtytje në kryerjen e vrasjes së rendë” të policit Triumf Riza.
Policia thotë se Sekiraqa është 51-vjeçar me adresë banimi në rrugën “Gryka e Llapushnikut” me numër 7 në Prishtinë.
“Policia e Kosovës kërkon nga qytetarët e Republikës së Kosovës që kushdo që ka informacion për vendndodhjen e personit të dyshuar në foton e bashkangjitur, të lajmërojë Policinë e Kosovës apo të lajmërohet në stacionin më të afërt policor ose nga telefonia fikse dhe mobile: 192 ose 038 550 999, të gjitha thirrjet në numrin 080019999 janë anonime, pa pagesë dhe konfidenciale.
Ju mund të dërgoni informatat e juaja edhe në adresën elektronike [email protected]”, thuhet në njoftimin e Policisë së Kosovës.
Nuk dihen rrethanat se si ka ardhur deri tek arratisja e Sekiraqës, mirëpo i njëjti nuk është në vuajtje të dënimit. Sekiraqa u shpall fajtor për nxitje të vrasjes të policit Triumf Riza. Për herë të parë në vitin 2016 Sekiraqa ishte dënuar me 36 vite burgim kurse sërish në vitin 2019 me 20 vite burgim.
Ish-polici, Triumf Riza, është vrarë më 30.08.2007 në Prishtinë./teve1.info/
