Pas alarmit për një mjet shpërthyes të ngritur gjatë orëve të paradites në ambientet e Kuvendit të Kosovës, Policia e Kosovës ka konfirmuar se ka nisur hetime në bashkëpunim me institucionet e tjera të sigurisë.
Sipas informacioneve paraprake të siguruara nga hetimet e deritanishme, policia thotë se dyshohet se kërcënimi ka ardhur përmes një telefonate të bërë nga një numër që gjendet jashtë territorit të Kosovës – konkretisht nga Serbia.
“Policia në bashkëpunim me prokurorinë kompetente do të vazhdojë hetimet e mëtejme, duke marrur të gjitha masat hetimore, përfshirë edhe komunikimet me partnerë ndërkombëtar të sigurisë, për të lokalizuar mjetet, rrjetet e komunikimit që janë përdoruar në këtë kërcënim”, thuhet në njoftim.
Ndërkohë, pas më shumë se tri orësh kontroll dhe ekzaminim të perimetrit të sigurisë nga njësitë e specializuara, përfshirë Njësinë K-9 dhe Njësinë e Reagimit të Shpejtë, doli se kërcënimi për mjet shpërthyes ishte i pabazë.
