Gazmend Hoxha, drejtor i Përgjithshëm i Policisë së Kosovës, në një konferencë të jashtëzakonshme ka dhënë detaje për armatimin e kapur në rrethinë të Zveçanit.
Ai tha se policia ka arritur me sukses ta kryejë operacionin, teksa tregoi sasinë e armatimit të sekuestruar.
“1 mijë e 588 municione apo fishekë, 10 armë të gjata, 6AK 47, mitrolozë, 62 shok-bomba, eksploziv, dylbi, radiolidhje, shurdhues, karikatorë të mbushur e të zbrazët, maska, antiplumb, unifromë e ushtrisë serbe dhe 10 uniforma të Policisë së Kosovës, pajisje për dronë, etj”, tha ai.
Hoxha ka thënë se tashmë është ndaluar një person, ish-zyrtar i Policisë së Kosovës, pasi dyshohet se është i lidhur me armët, të cilat janë gjetur në afërsi të shtëpisë së tij.
Hoxha tutje ka deklaruar se Policia e ka siguruar informacionin nga qytetarët dhe Agjencia e Kosovës për Inteligjencë (AKI).
Ndërsa ministri i Punëve të Brendshme, Xhelal Sveçla tha se armatim i sekuestruar ishte planifikuar të përdorët nga grupet terrorist ndaj pjesëtarëve të Policisë së Kosovës.
“Grupet terroriste kanë planifikuar sulme ndaj institucioneve të Republikës së Kosovës, pikë së pari ndaj Policisë së Kosovës, por pa kursyer edhe të tjerët”.
“Ky grup i armëve është mbetje e grupeve terroristë të udhëhequra nga Millan Radojçiq e të dirigjuar e mbështetur nga presidenti i Serbisë, Aleksandar Vuçiq”, shtoi ministri Sveçla.
