Policia e Kosovës ka kapur në flagrancë një person që dyshohet se dogji se një lokal në Zubin Potok, konkretisht në rrugën “Kolasinski Knjezeva” e ku më pas tentoi që ta djegë edhe shtëpinë e pronarit të lokalit.
Në njoftim është bërë e ditur se zjarri fillimisht është lokalizuar nga zyrtarët policorë që gjendeshin në sigurim të objektit komunal në Zubin Potok së bashku me pronarin e lokalit, përderisa në vend të ngjarjes gjithashtu kanë dalë edhe njësia e Zjarrfikësve.
Lidhur me këtë rast nuk është raportuar për persona të lënduar, por vetëm dëme materiale.
Sipas informacioneve fillestare, dyshohet se zjarri është shkaktuar qëllimshëm.
“Pas veprimeve të shpejta hetimore dhe burimeve operative në ora 00:50, Policia e Kosovës ka arrit ta identifikoj dhe ta arrestoj personin e dyshuar të përfshirë në këtë rast në rrugën “Kolasinskih Knjezeva” në Zubin Potok, në përpjekje për tu larguar/ikur nga vendi i ngjarjes, ku i njëjti gjithashtu kishte tentuar qe t’ia vë flaken edhe shtëpisë private të pronarit të njëjtë”, thuhet në njoftim.
Ndërkohë, të arrestuarit i janë gjetur dhe konfiskuar mjetet për vënie të zjarrit si një shishe plastike e mbushur me benzinë e modifikuar si koktej molotovi dhe dy shkrepëse për ndezje të zjarrit.
Ndërkaq, në shtëpi i janë gjetur dhe sekuestruar një radiolidhje, një uniformë ushtarake, dy pllaka të antiplumbit, një palë trenerka me njolla gjaku, si dhe njëzet e dy aparate për prodhimin e kriptovalutave.
Sipas informatave, policia dyshon se i arrestuari këto veprime i ka marrë ndaj pronave të familjes së gruas së tij, si pasoj e një mosmarrëveshje paraprake me gruan, pasi që kjo e fundit ishte larguar nga shtëpia dhe kishte shkuar që të jetoj në familjen e vet.
“Në vendin e ngjarjes ka dal edhe njësia e hetimeve rajonale të cilët kanë kontaktuar me prokurorin kujdestar dhe me udhëzim të tij ndaj të dyshuarit është caktuar masa e ndalimit për 48-orë për procedura të mëtejme ligjore”, thuhet në njoftim./teve1.info/
