Nxënësi Zejn Zejnullahu, të martën ishte raportuar si i zhdukur dhe më pas u gjet i vdekur në lumin e Gadimes.
Lajmi për vdekjen e tij është konfirmuar nga të afërmit që morën pjesë në përpjekjet për shpëtimin e tij. Ata kanë bërë të ditur se gjendja e Zejnës, në momentin kur u gjet, ishte shumë e rëndë.
“Pas një përpjekje të madhe që ju afruam ne, vendasit dhe mjekët, nxënësi jonë, Zejna nuk arriti të shpëtojë. Lusim Zotin e madh të mos ketë këso raste. Ngushëllime familjes!” shkroi Driton Shabiu.
Vdekja e nxënësit është konfirmuar për media edhe nga mjekja kujdestare në QKUK, Dafina Basholli.
Po ashtu, Policia e Kosovës ka dhënë detaje zyrtare lidhur me rastin.
“Lipjan 27.01.2026-NN. Lidhur me rastin, pas pranimit të një informate se viktima mashkull kosovar nuk është kthyer në shtëpi, ka filluar kërkimi i tij me ç’rast nga dëshmitari mashkull kosovar i njëjti është gjetur në lum. Viktima me autoambulancë është transportuar në QKUK-Prishtinë, ku më pas ka ndërruar jetë. Vdekjen e viktimës e ka konstatuar mjeku kujdestar. Ndërsa në vendin e ngjarjes ka dalë njësitet përkatëse, dhe vendim të prokurorit trupi i pajetë dërgohet në IML për obduksion”, thuhet në raportin policor.
