Policia e Kosovës e ka ftuar për intervistim një 43-vjeçar, nën dyshimin për keqtrajtim të kafshëve.
A.K., kishte publikuar një video ku shihen dy qen të racës “Kangall” duke u kacafyer rëndë.
Policia thotë se pas intervistimit nga hetuesit policorë dhe me urdhër të prokurorit të shtetit, ndaj tij është iniciuar rasti “Keqtrajtimi i kafshëve dhe ndotja e ushqimit dhe ujit të shtazëve”.
Ndërkohë, ai është liruar në procedurë të rregullt, ndërsa rasti do t’i procedohet Prokurorisë Themelore në Ferizaj për veprime të mëtejme ligjore.
“Policia Rajonale e Ferizajt apelon te të gjithë qytetarët që të trajtojnë me kujdes dhe përgjegjësi kafshët, si dhe të mos lejojnë veprime që bien ndesh me ligjin. Çdo formë e keqtrajtimit të kafshëve është e dënueshme me ligj.
Ftojmë qytetarët që rastet e tilla t’i raportojnë menjëherë në numrin 192 ose përmes aplikacionit digjital ‘Lajmëro Policinë’”, apelon policia./teve1.info/
