Policia e Kosovës ka nisur trajtimin e një rasti që lidhet me Arianit Sllamnikun, i cili sipas raportimeve mediatike dyshohet se u ka shitur disa personave ilaçe veterinare, duke pretenduar se ato shërbejnë për shërimin e fëmijëve nga autizmi.
Zëdhënësi i Policisë për rajonin e Gjilanit, Ismet Hashani, për teve1.info ka konfirmuar se rasti është në proces trajtimi nga autoritetet policore.
Ai ka bërë të ditur se Policia e Kosovës, në bashkëpunim të ngushtë me Prokurorinë e Shtetit dhe institucionet e tjera relevante, është duke ndërmarrë veprimet e nevojshme hetimore.
“Mund të ju konfirmojmë se në lidhje me rastin për të cilën keni pyet, ky rast është duke u trajtuar nga ana e Policisë së Kosovës në koordinim të plotë me Prokurorinë e Shtetit dhe institucionet e tjera përkatëse. Për vazhdimin e hetimeve lidhur me këtë rast do të ju njoftojmë me kohë”, deklaroi ai.
Ndërkohë, edhe Prokuroria Themelore në Gjilan ka nisur hetimet.
Prokuroria njoftoi se ka dhënë autorizimin për Policinë e Kosovës që të ndërmarrë veprime hetimore në lidhje me rastin.
Po ashtu, Prokuroria theksoi se do të vazhdojë të informojë publikun për zhvillimet e mëtejshme.
Lidhur me këtë rast, Ministria e Shëndetësisë, ka njoftuar se i ka informuar institucionet kompetente dhe se është në koordinim me Policinë e Kosovës për trajtimin e mëtejmë të rastit.
“Ministria e Shëndetësisë u ka bërë thirrje qytetarëve që t’u besojnë vetëm metodave të verifikuara shkencërisht, të cilat ofrohen nga institucione dhe profesionistë të licencuar shëndetësorë. Lidhur me këtë rast, Ministria e Shëndetësisë ka njoftuar institucionet kompetente dhe është në koordinim me Policinë e Kosovës për trajtimin e mëtejmë të çështjes, në përputhje me kompetencat ligjore”- thuhet në reagim. /teve1.info/
