Brenda kësaj hapësirë tash e një kohë kultivohej lëndë narkotike.
Puna në këtë laborator të drogës u ndërpre të mërkurën nga Policia e Kosovës, e cila zbuloi këtë punishte në një nga banesat në Komunën e Prizrenit.
Për këtë janë arrestuar tre persona, të cilëve edhe iu është caktuar masa e ndalimit për 48 orë.
“Të pandehurit, nga data e pa vërtetuar dhe në vazhdimësi deri më datë 23.04.2025, në Prizren, pa autorizim dhe në bashkëkryerje, kultivojnë bimën “Kanabis Sativa” (Mariuhanë), me qëllim të prodhimit të narkotikëve ose substancave psikotrope, në atë mënyrë që në një objekt të mbyllur krijojnë një laborator të brendshëm “In door”, ku kanë kultivuar dhe kanë rritur rreth 200 bimë “Kanabis Sativa”, kanë bërë tharjen e tyre, dhe i kanë përgatitur për shitje në treg. Me këto veprime në bashkëkryerje kanë kryer veprën penale “Kultivimi i bimës së hashashit, shkurres së kokainës ose bimëve të kanabisit” nga neni 272 par.1 lidhur me nenin 31 të KPRK- së”, thuhet nga Prokuroria.
Por ky nuk është aksioni i vetëm i Policisë së Kosovës brenda më pak se 24 ore për kapjen e drogës.
Të martën institucionet e sigurisë arritën të shkatërrojnë rrjetin shpërndarës të kokainës në Prishtinës.
“Në rastin konkret me vendim të Prokurorit të shtetit, janë ndaluar tre (3) persona të dyshuar për përfshirje në veprimtari kriminale, dhe po ashtu gjatë këtij operacioni janë sekuestruar substanca narkotike me peshë të përgjithshme katër (4) Kg e 945.27 gram, tre (3) telefona, dy (2) vetura, dy (2) pistoleta, gjashtëdhjetë e katër (64 fishek) si dhe para të gatshme rreth katër mijë (4,000) euro”.
E sipas ish hetuesi policor, Valdet Hoxha këto raste shpërfaqin kapacitetet shtetërore për kapjen e rrjeteve kriminale në Kosovë.
“Është një indikator i qartë që Republika e Kosovës tashmë i ka të konsiliduara mekanizmat e zbatimit të ligjit dhe nuk lejon që pavarësisht specifikave, organizimit hierarkisë grupeve të mundshme potenciale kriminale, është shteti ai që ka situatën në kontrolle. Pavarësisht situatave sfiduese, pavarësisht vështirësive në luftimin e këtyre dukurive që janë sfiduese edhe për vendet me një traditë me të konsoliduar të shtet-ndërtimit”, tha Hoxha.
Prokuroria Themelore në Prishtinë mes tjerash ka bërë të ditur se janë duke vazhduar hetimet dhe se po ndërmarrin masa hetimore për zbardhjen e rastit në tërësi.
