Autoritetet gjermane kanë nisur hetimet për të zbardhur rrethanat e aksidentit të rëndë që ndodhi pak pas mesnatës në autostradën A8 Salzburg–Mynih, ku një autobus me pasagjerë nga Kosova u përplas me një kamion me rimorkio.
Nga ky aksident mbetën të lënduar 30 persona, nëntë prej tyre lehtë kurse një tjetër sipas policisë është lënduar më rëndë.
Sipas raportimeve të para, nuk ka prova që të tregojnë për ndonjë defekt teknik në autobus apo në kamion.
Mediat gjermane thonë se hetimi aktual është i fokusuar në zbardhjen e arsyes pse shoferi i autobusit nuk arriti të dallojë mjetin përpara me kohë, çka çoi në përplasjen e fortë me pjesën e pasme të rimorkios.
Shoferi, sipas burimeve policore, u përpoq të devijonte majtas në momentin e fundit, por përplasja ishte e pashmangshme.
Në vendin e ngjarjes kanë dalë një numër i madh i ekipeve emergjente, policisë dhe zjarrfikësve.
Qarkullimi në këtë autostradë në drejtim të Munchenit u ndërpre për dy orë e gjysmë.
Sipas vlerësimeve fillestare të policisë, dëmi material që rezultoi arrin në afërsisht 150,000 euro. Autobusi i dëmtuar u desh të tërhiqej me rimorkio.
Raportohet se një autobus nga Kosova u aksidentua në Gjermani, 30 të lënduar
