Dy persona janë arrestuar si të dyshuar për plagosjen e tre personave nga të shtënat jashtë gjykatës ku po gjykohej vrasësi i boksierit Besar Nimani, ka raportuar e përditshmja gjermane “Bild”.
Sipas “Bild”, i dyshuari i tretë është vëllau i Besar Nimanit, i cili tashmë është në kërkim nga policia gjermane.
“Sipas deklaratave të dëshmitarëve, personi tjetër i dyshuar thuhet se është vëllai i Besarit. Aktualisht policia është në kërkim të tij. hetuesit mjeko-ligjorë kanë nisur punën në vendngjarje. Arma me të cilën dyshohet se është përdorur në plagosje është gjetur pranë vendit të ngjarjes”, shkruan “Bild”.
Seanca e të mërkurës nisi në ora 09:00. Hyseyin Akkurt po akuzohet për vrasjen e Nimanit më 9 mars të vitit të kaluar.
