Policia e Kosovës ka njoftuar se, mbrëmjen e së martës ka gjetur një armë zjarri, dy thika dhe një boks hekuri, gjatë kontrollimit të një autobusi urban në Ferizaj kryesisht me nxënës.
Sipas njoftimit, kontrolli është kryer me dyshimin se nxënësit e shkollave të mesme të larta bartin me vete mjete të dyshimta dhe të rrezikshme.
Lidhur me rastin është njoftuar prokurori i shtetit dhe me vendim të tij është iniciuar një rast për hetim ‘’mbajtje në pronësi, kontroll, ose posedim të paautorizuar të armës’’.
“Kontrollimi i autobusëve urban do të vazhdojë edhe në ditët në vijim me qëllim parandalimin dhe luftimin e dukurive negative tek nxënësit. Ndërsa ftojmë qytetarët për bashkëpunim, që nëse kanë informacione rreth dukurive negative tek nxënësit të njoftojnë menjëherë stacionin më të afërt të policisë, apo përmes aplikacionit digjital ‘’Lajmëro Policinë ’’ dhe në numrat kujdestarë të cilët janë 192 , 0290/326-250 dhe 0290/322-406”, thuhet në njoftim./teve1.info/
