Policia e Shqipërisë ka arrestuar dy shtetas të Kosovës në kërkim ndërkombëtar.
Rasti i parë ka ndodhur në pikëkalimin në Morinë, ku i arrestuari po kërkohej nga Norvegjia .
35- vjeçari kërkohet për veprat penale, “Vjedhje me dhunë” dhe “Plagosje.
Si rezultat i kontrolleve dhe verifikimeve të imtësishme në hyrje/dalje, me objektiva goditjen e paligjshmërive në kufi, si dhe ndalimin e shtetasve të shpallur në kërkim, të cilët tentojnë të lëvizin ilegalisht për t’iu shmangur përgjegjësisë penale, shërbimet e Policisë Kufitare të Morinës, në bashkëpunim me shërbimet e DVP Kukës, kapën në hyrje të RSh-së dhe arrestuan me qëllim ekstradimin, shtetasin kosovar: J. K., 35 vjeç, banues në Kosovë. Nga verifikimet e kryera dhe nga informacioni i shkëmbyer me Interpol Tiranën rezultoi se ky shtetas ishte shpallur në kërkim ndërkombëtar nga Interpol Oslo, pasi akuzohet nga Gjykata Lokale Sor Rogaland, për veprat penale “Vjedhje me dhunë” dhe “Plagosje’”, thuhet nga Policia e Shtetit.
Sipas njoftimit ai do të ekstradohen në Norvegji.
Ndërsa, kosovari i dytë është arrestuar në pikëkalimin kufitar në Muriqan në dalje të Shqipërisë.
31- vjeçari banues në Pejë sipas njoftimit kërkohet për veprën penale “Mashtrim”
“Shërbimet e Policisë Kufitare të PKK Muriqan, si rezultat i kontrolleve të shtuara dhe i shkëmbimit të informacionit me Interpol Tiranën, kanë kapur në dalje të RSh-së, shtetasin kosovar F. K., 31 vjeç, banues në Pejë. Ky shtetas ishte shpallur në kërkim ndërkombëtar, për veprën penale “Mashtrimi”, parashikuar nga Kodi Penal i Kosovës. Interpol Tirana, në bashkëpunim me autoritetet kosovare, do të kryejë procedurat për ekstradimin e 31-vjeçarit, në Kosovë”, thuhet nga Policia e Shtetit.
