Policia e Kosovës ka bërë përgatitjet e nevojshme operacionale policore, për protestën e thirrur nga Partia Socialdemokrate, të shtunën në ora 14:00 në Prishtinë.
Përmes një komunikate, Policia ka njoftuar se do t’i shtojnë aktivitetet operative para, gjatë dhe pas përfundimit të protestës, derisa u kanë bërë thirrje pjesëmarrësve të protestojnë në mënyrë të qetë.
“Policia e Kosovës me qëllim të ruajtjes së rendit dhe qetësisë publike si dhe mbarëvajtjes së protestës së paraparë të mbahet sot më datë 25.03.2023 në orën 14:00 në Prishtinë, ka bërë përgatitjet e nevojshme operacionale policore. Policia e Kosovës e njeh të drejtën e shprehjes së lirë, pakënaqësive (protestës) si e drejtë ligjore. Sipas procedurave të parapara policia do të merr masa dhe do të shtojë aktivitetet operative para, gjatë dhe pas përfundimit të protestës. Me këtë rast fton qytetarët, pjesëmarrësit në protestë që protesta të zhvillohet e qetë duke respektuar ligjet e vendit dhe që kërkesat e tyre t’i shpalosin në mënyrë demokratike e ligjore”, thuhet në komunikatë.
Andaj, është bërë e ditur që Policia ka ndërmarrë masat e nevojshme, për të siguruar që mbarëvajtja e protestës të kalojë pa ndonjë incident dhe që pjesëmarrësit në protestë të shprehin qëllimin e tyre në mënyrë demokratike në suaza ligjore./teve1.info/.
