Operacioni për parandalimin e dukurive kriminale ka ndodhur në zonën kufitare të rajonit të Prishtinës(Podujevë), Mitrovicës(Leposaviq, Zubin Potok), dhe në Viti e Gjilan.
Sipas policisë së Kosovës operacioni ka pasur për qëllim, luftimin e parandalimin e kontrabandës, mbajtjen e rendit, zbatueshmërinë e ligjit dhe qetësisë e sigurisë publike, shkruan Teve1.info
“Përveç tjerash Policia e Kosovës me njësitet e saja relevante të përfshira në këtë operacion policor, ka ndërmarr masat e nevojshme preventive për të parandaluar dhe pamundësuar shfrytëzimin e rrugëve ilegale nga ana e personave të dyshuar, të cilët dyshohet se me mjete të ndryshme kanë shfrytëzuar rrugët ilegale në brezin kufitar që lidhë Republikën e Kosovës me Serbinë dhe Republikën e Kosovës me Republikën e Maqedonisë së Veriut, për kryerje të aktiviteteve kriminale dhe kontrabanduese”, thuhet në komunikatën e policisë.
Tutje është bërë e ditur se në këtë operacion policia ka përdorur të githë mekanizmat ligjor, autorizimet dhe kompetencat policore, pajisjet dhe njësitet e ndryshme policore për të zbatuar ligjet pozitive, mbrojtjen e rendit Kushtetues, parandalimin dhe luftimin e kontrabandës dhe dukurive tjera kriminale
“Angazhimi, përkushtimi drejt realizimit të objektivave strategjike nga Policia e Kosovës do të vazhdojë, për të parandaluar aktivitetet kriminale, kontrabandën dhe krimin transkufitar, me qëllim të krijimit të një klime më të qetë dhe me të sigurt të qytetarëve, e në veçanti të atyre që jetojnë në afërsi të brezit kufitar”, ka njoftuar policia.
