Policia e Kosovës ka konfirmuar arrestimin e Gëzim Çelës, i cili njihet si “baron i drogës”.
Përmes njoftimit, Policia e Kosovës ka zbuluar se ai po strehohej nga një shtetas i Kosovës, në një fshat të Vitisë.
Policia ka bërë të ditur se në momentin e arrestimit Çela ishte në fshatin Dardani të Ferizajt dhe, përveç shtetasit kosovar, ai ishte i shoqëruar edhe nga dy femra shtetase të Shqipërisë.
“Për arrestimin janë njoftuar organet e drejtësisë dhe me urdhër nga prokurori i Departamentit të Krimeve të Rënda-Ferizaj është kontrolluar shtëpia e të dyshuarit A.I., në një fshat të Vitisë. Gjatë kontrollit në shtëpi është gjetur dhe konfiskuar një AK-47 me 15 fishekë. Po ashtu, lidhur me rastin është njoftuar edhe Njësia FAST-ILECU të cilët në koordinim me organet e drejtësisë, do të merren me procedura rreth rasteve kur kemi të bëjmë me arrestime të personave që janë në kërkim ndërkombëtar”, thuhet në njoftim.
Çela u shpall në kërkim nga autoritetet në Shqipëri rreth dy muaj më parë, pasi dyshohet se drejtoi një grup për trafikun e lëndëve narkotike.
Më herët ai ka qenë i arrestuar për “shfrytëzim prostitucioni” dhe trafik ndërkombëtar droge”./teve1.info/
