Dhjetëra gazetarë shqiptarë po raportonin minutë pas minute atë që po ndodhte të hënën në Zveçan.
Këtu qytetarët serbë, kishin nisur protestën, për ta penguar punën e kryetarit të ri të kësaj komune, Ilir Pecit.
Njëri nga gazetarët që raportoi nga këtu, ishte Sylejman Sylejmani nga Radio Televizioni Dukagjini.
Por për asnjë moment të kësaj dite, Sylejmani thotë se nuk u ndie i sigurt ta bënte punën e tij.
“Që prej mëngjesit kur kemi qenë në Zveçan për të raportuar, nuk kemi qenë të sigurt, që nga incidenti mes Policisë së Kosovës dhe protestuesve, kur u hodh gaz lotsjellës, më pastaj KFOR e kishte situatën në kontroll. E kemi parë që ne kërkuam ndihmë në një lokacion të pasigurt, mirëpo as Policia e Kosovës e as KFOR-I nuk na i ofruan ndihmën e cila do duhej t’i ofrohej gazetarëve në situata të tilla”, thotë ai.
Ndërkohë orët e pasdites, sollën një pamje krejt tjetër.
Pas disa tentimeve për të negociuar, protestuesit serbë filluan të hidhnin gjësende të forta drejt pjesëtarë të KFOR-it.
Më pas, erdhi edhe kundërpërgjigja e këtyre të fundit.
Ndërsa në gjithë këtë situatë, nuk u afrua asnjë siguri për gazetarët.
Ekipi i Tëvë1 së bashku me gazetarët e tjerë, strehim gjetën në një lokal te një qytetari serb, afër objektit të komunës.
Por, sipas Leonita Bajramit, gazetare në Top Channel, as qëndrimi këtu nuk ofronte siguri.
“Është rekomanduar që të qëndrojmë në atë lokal, në mënyrë që të na largojnë të sigurt. Megjithatë aty vërehej se mungonte siguria, meqë në krahun tonë të djathtë qëndronin protestuesit serbë, të cilët sulmonin KFOR-in, dhe na sulmonin edhe ne kur dilnim të xhironim, na sulmonin edhe neve gazetarëve”, thotë ajo.
Por, edhe në lokalin pranë të cilit hidheshin mjete shpërthyese, gazetarët vazhduan ta bënin punën e tyre.
Për largimin e sigurt nga këtu, disa herë u kontaktua Policia e Kosovës.
Meqë këtë nuk mund ta bënin këta të fundit, filluan tentimet që kjo punë t’i besohej KFOR-it.
Por, cila ishte përgjigja e tyre?
“Përgjigja e tyre ishte që ne jemi të lirë të shkonim, na i tregonin rrugën, në të cilën qëndronin personat e maskuar. Ne kërkonim një korridor të sigurisë për t’u larguar, dhe këtë të na i ofronin ata”, ka thënë Xhemajl Rexha, kryetar i AGK-së.
Pas tri orëve qëndrim në këtë lokal, gazetarët të ndihmuar nga pronari i lokalit, që ishte serb lokal, filluan largimin nga ky lokal.
Por, këtë u desh ta bënin në këmbë, mes maskave që pak minuta më parë përdoren edhe armët e zjarrit kundër organeve të rendit.
Tëvë1 ka pyetur edhe në Policinë e Kosovës, se pse nuk ofroi siguri për gazetarët në Zvecan të hënën, në një situatë të tillë të tensionuar.
Por këta të fundit nuk kanë kthyer përgjigje.
