Policia e Kosovës të martën ka zhvilluar aksion në 13 lokacione që lidhet me sulmin terrorist të 24 shtatorit në Banjskë të Zveçanit. Bastisja ka zgjatur disa orë, teksa nga ky aksion nuk pati arrestime.
Nën përcjellje të EULEX-it, po shkojnë drejt komunës së Leposaviqit.
Policia e Kosovës të martën ka zhvilluar aksion lidhur me sulmin terrorist të 24 shtatorit në Banjskë të Zveçanit.
E kjo shtëpi afër objektit të kësaj komune është njëra nga 13-të lokacionet që e bastisi Policia e Kosovës.
Zyrtarë të Njësisë Speciale u panë brenda dhe për rreth shtëpisë.
Kontrollet po kryhen edhe me mjete tjera ndihmëse si dhe po kontrollohet çdo pjesë e oborrit.
Gjatë kontrollit, nuk u lejua qarkullimi i banorëve në lokacionet e afërta.
Mirëpo, për media nuk u bë e ditur se çka u konfiskua.
E përveç komunës së Leposaviqit, aksion u zhvillua edhe në Mitrovicën e Veriut.
Edhe aty, u bënë kontrolle nga Njësia Speciale.
Gjatë ditës aksion policor pati edhe afër lagjes së Tre Rrokaqiejve.
Sipas Policisë së Kosovës, 7 lokacione janë bastis në Mitrovicën Veriore, tre në komunën e Zveçanit dhe tre të tjerë në komunën e Leposaviqit.
Ndërkohë, nga Policia e Kosovës në veri për televizionin kanë bërë me dije që këto ditë kanë bllokuar edhe disa rrugë ilegale në rreth 20 lokacione që kanë shërbyer si rrugë kontrabande.
